Алматы әкімі Дархан Сатыбалды мен Орталық Азиядағы BYD компаниясының басқарушы директоры Айван Цаоның кездесуі барысында Түрксіб ауданындағы «Астана Моторс» зауыты базасында электробустар өндірісін іске қосу жоспары талқыланды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Жоба аясында құрастырудан бастап құрамдас бөлікті өндіруге дейінгі жергілікті үлес кезең-кезеңімен артады. Бұл қала көлігін жаңғыртуға, экологияға мән беруге және жергілікті өнеркәсіпті дамытуға септігін тигізеді. Қауіпсіздігі жоғары, жүріс қоры ұлғайтылған және энергия тиімділігімен ерекшеленетін инновациялық Blade батареясы орнатылған BYD B12 электробусын шығару жоспарланып отыр.«Экологиялық таза көлікті дамыту — Алматының стратегиялық басымдығы!» — деді әкім Дархан Сатыбалды.
Бұл бастама ауаға бөлінетін зиянды заттарды азайтып, жаңа жұмыс орындарын ашуға және қаланың өндірістік әлеуетін арттыруға мүмкіндік береді. BYD әлемнің 400 қаласына 110 000-нан астам электробус жеткізген.