Астаналық жастарға тиімді шарттармен баспаналы болуға көмектесетін «Елорда жастары» тұрғын үй бағдарламасы белсенді түрде жүзеге асырылып жатыр. Астана тұрғыны Саян Шәкенов осының арқасында отбасының қалай баспаналы болғанын айтып берді, деп хабарлайды kazlenta.kz тілшісі қала әкімдігінің ресми сайтына сілтеме жасап.
Саян энергетика саласында 2014 жылдан бері жұмыс істейді. 2019 жылы ол отбасымен сатып алу құқығынсыз жалға берілетін тұрғын үй бағдарламасына қатысып, берілген пәтерде бес жыл тұрды.
2024 жылы отбасы «Елорда жастары» бағдарламасына қатысуға өтініш беріп, мақұлданды. Саянның тұрақты жалақысы, жақсы несие тарихы және зейнетақы жинақтары іріктеуден алғашқылардың бірі болып өтуіне мүмкіндік берді.
«Елорда жастары» бағдарламасы бойынша жастарға жылдық 5 пайызбен жеңілдетілген несие беріліп жатыр.Несиенің максималды сомасы – 20 млн теңгеге дейін, бастапқы жарна – 10%, несие мерзімі – 19 жылға дейін. Бағдарламаға қатысушылар баспананы жаңадан немесе жылжымайтын мүлік нарығынан сатып ала алады. 2023 жылдың наурыз айынан бастап қатысудың жас шегі 34 жасқа дейін ұлғайтылды, бұл бағдарламаға көбірек жас мамандардың қатысуына мүмкіндік берді. 2024 жылдың басынан бері жалға алу шарттары жарамды 778 жас астаналық несиелеу рәсімінен өтуге жіберілді. Сәуір айының басында олардың 370-і төлем қабілеттілігін растаса, 200 қатысушы баспана иесі атанды.