Елімізде өмірге деген құлшынысы жоғары, таланты да талапты мүмкіндігі шектеулі балалар бар. Осындай балалармен 9 жыл бойы жұмыс жасап, бойындағы талантын дамытып отырған «Аялаған алақан» қоғамдық қоры «Әлем балалардың көзімен» атты көрмесімен елімізде ғана емес, әлем бойынша кең танымалдылыққа ие. Ендігі кезекте қор тәрбиеленушілерінің туындылары қыркүйек айында алғаш рет қайырымдылық аукционына шығарылмақ, деп хабарлайды kazlenta.kz.
Мүгедек балалардың туындыларын елге паш еткен аталмыш көрме 2020 жылы Қазақстанның барлық қалаларында ұйымдастырылды. «Аялаған алақан» қоры биыл Қазақстан Республикасының басқа елдердегі елшіліктерінің қолдауымен бұл көрмені халықаралық деңгейге көтерді. Алғашқы көрме Үндістанның Хайдерабад қаласында өткізілсе, кейін билеуші Әмірліктердің отбасы мүшелерінің қатысуымен Біріккен Араб Әмірліктерінің Абу-Даби қаласында оздырылды. Сонымен қатар, Францияда, Латвияда, Израильде де көрме ұйымдастырылып, балалар дипломдармен, халықаралық деңгейдегі грамоталармен марапатталды. Көрме Арменияның бірінші ханымының қатысуымен Ереванда және Оманда, Түрікменстанда, Люксембургте де өткізілді. Ендігі Еуропа кеңесінің рұқсатымен Страсбургте де өткізу жоспарланып отыр.
Қордың басты мақсаты қоғамға әр баланың бойында танылмаған таланттың, дарынның бар екенін көрсету және денсаулыққа, түрлі қиындықтарға қарамастан бұл сәбилердің өмірге деген құлшынысын, әлемге мейірімді көзбен, таза оймен қарайтынын өнер арқылы жеткізу болып табылады.
Көру, есту қабілеттері төмен, зерде бұзылыстары бар мүмкіндігі шектеулі балаларға қор жанынан тегін сурет салу, қолөнер бұйымдарын әзірлеу, шет тілдерін үйрету сынды тегін үйірмелер қарастырылған. Қор жанынан сурет салу үйірмесінің ашылғанына биыл 4 жылдай болған. Айта кетерлік жайт, тәрбиеленушілерге жас мамандар тегін сабақ береді.
Суретші Дәурен Ғұмаров балаларға суреттен сабақ беріп қана қоймай, балаларға психологиялық тұрғыдан көмек беруді жөн көреді. «Себебі сурет арқылы балалар әлеммен ішкі толғаныстарымен бөліседі. Мүмкіндігі шектеулі балалармен жұмыс жасаудың өзіндік қиыншылықтары бар, дегенмен балаларға сурет салудың қандай қуаныш, бақыт сыйлайтынын көрген сәтте бар қиындықты бір сәтте-ақ ұмытып кетесің» деп өз ойымен бөлісті.
Қор тәрбиеленушілері де, ата-аналар да ұстаздарға және жетекшілерге дән риза. Кескіндеуді, қылқаламды дұрыс ұстауды, суретке түс таңдауды ынтамен үйренген оқушылар да, балаларының дарынының дамығанына, суретші ретінде деңгейінің өскеніне, жеткен жетістіктеріне қуанышты ата-аналар да «Аялаған алақан» қорына шынайы алғыстарын жеткізуде.
Рада Хайрушева, «Аялаған алақан» қорының негізін қалаушы-жетекшісі:
Сонымен қатар қор тек мүмкіндігі шектеулі балаларға ғана емес, жетім балаларға, аз қамтылған және көп балалы отбасыларға көмек береді. Қайырымдылықты мақсат еткен қор жұмысы әлем бойынша көптеген ел арасында қызығушылыққа ие болып отыр.
Биыл мүмкіндігі шектеулі балалардың туындылары алғаш рет қайырымдылық аукционына шығарылмақ. Бірақ аукционда қор тәрбиеленушілерінің суреттерінен бөлек өз туындыларын сыйға тартқан атақты суретшілер туындылары да сатылымға қойылады. Қыркүйек айында Орал қаласында өтетін аукционға атақты суретшілер мен шетелдік қонақтар арнайы шақырылғалы отыр. Жиналған қаражатқа Орал қаласында мүмкіндігі шектеулі балаларға тегін сабақ беретін өнер мектебін ашу жоспарлануда.