Алматы әкімі Ерболат Досаевтың тапсырмасы бойынша биылғы жылдың маусым айында Бостандық ауданының Ерменсай шағын ауданында «Нұрлытау» су жинағыш құрылғысының құрылысы басталады. Бұл туралы Алматының Энергетика және сумен жабдықтау басқармасы мәлім етті, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Жаңа нысанның өнімділігі тәулігіне 9 мың текше метр су. Жоба аясында тарату желілерінің құрылысы да көзделген. Бұл 2026 жылдың соңына дейін Ерменсай және Нұрлытау шағын аудандарының 25 мыңнан астам тұрғынын сапалы орталықтандырылған ауыз сумен қамтамасыз етуге мүмкіндік береді, осылайша бұл аймақтағы көп жылдан бергі су тапшылығы мәселесі шешіледі.
Тарихи тұрғыдан алғанда Бостандық ауданының оңтүстік бөлігі, соның ішінде Ерменсай, «Алматы Су» мемлекеттік кәсіпорнының қызмет көрсету аймағына кірмеген. Сумен жабдықтаумен жеке компаниялар – «Водснаб» ЖШС (бұрынғы «Орхан»), «Ерменсайводгаз» ЖШС және «Баур ЛТД» ЖШС айналысып келген. Алайда тұрғындар бұл ұйымдардың қызмет сапасының төмендігі мен тарифтердің жоғары болуына байланысты ұзақ жыл бойы негізді шағым айтып келеді.
Қазіргі уақытта «Водснаб» ЖШС-пен сот процестері жалғасып жатқанымен, әкімдік жағдайды түбегейлі жақсарту және сот шешімдерін күтпей-ақ тұрғындарды үздіксіз сумен қамтамасыз ету үшін нақты басқарушылық шешім қабылдады.
Жобаның негізгі кезеңдерінің бірі – Әл-Фараби даңғылынан Арайлы көшесінің бойымен өтетін жаңа магистральды реверсивті су құбырының құрылысы болды. Құбыр тарту жұмыстары аяқталғаннан кейін Бостандық ауданы әкімінің аппараты тарату желілерін салады. Бұл көше бойында орналасқан тұрғын үйлер мен жеке секторды орталықтандырылған сумен жабдықтауға жылдам қосуға мүмкіндік береді.
Келешекте бұл магистральды су құбыры жобаланған «Нұрлытау» су дайындау станциясымен қосылады. Мұндай инженерлік шешім Бостандық ауданының оңтүстік бөлігіндегі сумен жабдықтау жүйесінің сенімділігі мен тұрақтылығын едәуір арттырады әрі қала инфрақұрылымының тұрақты дамуына құқықтық және техникалық негіз қалыптастырады.