Қазақстандық әуекомпанияның ұшағы Астанаға қону кезінде құспен соқтығысты, - деп хабарлайды kazlenta.kz тілшісі Tengritravel.kz сайтына сілтеме жасап.
1 мамырда Шымкент – Астана бағыты бойынша жолаушылар ұшағы қону кезінде құспен соқтығысты. Оқиға рейстің соңғы кезеңінде, ұшақ Астана халықаралық әуежайына қонғалы жатқан сәтте болған.
SCAT әуекомпаниясының баспасөз қызметі мәліметінше, құстың ұшаққа соғылуы салдарынан әуе кемесінің бір бөлшегі зақымданған. Жедел техникалық тексеру жүргізіліп, зақымданған бөлшекті ауыстыру қажет болған.
"Шымкент – Астана рейсінің қонуы кезінде құспен соқтығысу жағдай болды. Зақымданған бөлшекті ауыстыруға байланысты Астана – Шымкент бағытының жолаушыларына қонақүйге орналастыру және әуежай терминалында тамақпен қамтамасыз ету шаралары жасалды", – деп түсіндірді компанияның баспасөз қызметі.
Компания жолаушылардың қауіпсіздігі басты басымдық екенін атап өтті. Сонымен қатар, әуекомпаниясы әуе кеңістігіндегі құстардың қозғалысына әсер ете алмайтынын ескертіп, мұндай тосын жағдайларға байланысты рейстер кестесіндегі өзгерістерге түсіністікпен қарауға шақырды.
"Компания құстардың қозғалысына әсер ете алмайды және осындай жағдайларға байланысты рейстердің кейінге шегерілуіне түсіністікпен қарауды сұрайды. Жолаушылардың қауіпсіздігі – біздің басты басымдығымыз", – деп қосты SCAT өкілдері.
Дереккөздерге сүйенсек, жолаушылар мен экипаж мүшелері арасында зардап шеккендер жоқ. Қону штаттық режимде өткен, ал барлық жолаушы кері рейстің кешігу себептері туралы дер кезінде хабардар етілді.