Астанада құрылыс компаниясы абаттандыру ережелерін өрескел бұзғаны үшін жауапкершілікке тартылды, – деп хабарлайды kazlenta.kz тілшісі Polisia.kz сайтына сілтеме жасап.
Астана қаласында "Таза Қазақстан" экологиялық акциясы аясында полиция қызметкерлері Түркістан көшесінің бойында орналасқан құрылыс нысанын тексеру барысында бірнеше әкімшілік құқық бұзушылықты анықтады. Тексеру барысында жүк көліктерінің дөңгелектерінен жол бойына саз балшықтың түсіп жатқаны анықталды. Сонымен қатар құрылыс компаниясының дөңгелектерді жууға арналған арнайы пунктпен қамтамасыз етпегені және құрылыс алаңының айналасын тиісті деңгейде қоршамағаны анықталды.
Аталған заң бұзушылықтар ҚР Әкімшілік құқық бұзушылық туралы кодексінің 505-бабының 2-бөлігі бойынша рәсімделіп, полиция қызметкерлері әкімшілік хаттама толтырды. Науқан басталғаннан бері рұқсат етілмеген жерлерге қоқыс шығарғаны және ағынды суларды төккені үшін 510-нан астам жүк көлігі мен кәріз тасушы көлік жүргізушілері жауапқа тартылды. Полиция қала тұрғындары мен ұйымдарды қала аумағын абаттандыру қағидаларын қатаң сақтауға және тұрмыстық, құрылыс қалдықтарын арнайы рұқсат етілген орындарға ғана шығаруға шақырады.