«Шардара» су қоймасына осы күні былтырғыдан аз су түсті, деп хабарлайды kazlenta.kz тілішсі Қазақпаратқа сілтеме жасап.
13 наурыз күнгі мәліметке сүйенсек, мұнда 4698 млн текше метр су жиналған. Бұл өткен жылдың есепті кезеңімен салыстырғанда 15 млн текше метр аз.– «Шардараның» жобалық су жинау көлемі – 5200 млн текше метр. Қойманы толтыруды жоспарлап отырмыз. Осыған дейін оған секундына 500 текше метр су жіберсек, 12 наурыздан бері 400 текше метр су жібере бастадық. Одан бөлек «Көксарай» су реттегішіне де су жинап жатырмыз. Биыл Сырдарияға көп су түседі деген болжам жоқ, – деді Су ресурстарын реттеу, қорғау және пайдалану жөніндегі Арал-Сырдария бассейндік инспекциясы басшысының орынбасары Сейітқасым Әбуов.
– Сондай-ақ Қызылорда облысында жалпы сыйымдылығы 34,7 млн текше метр болатын «Бесарық», «Жиделі», «Манап», «Қыраш», «Көлтоған», «Құмсай» су қоймалары бірнеше сатылы тексеруден өтті. Олардағы су көлемі – 17,2 млн текше метр. Өңірде тағы 22 магистралды канал, 1 қорғаныс дамбасы, су тастайтын 2 құрылыс нысаны, Солтүстік Арал теңізі бөгеті мен 1 тоған бар, – деді Сейітқасым Әбуов.