Ақмола облысының полицейлері бұрын жасалған қылмысты ашып, ұрланған оқу макеттерін оқу орнына қайтарды, - деп хабарлайды kazlenta.kz тілшісі Polisia.kz сайтына сілтеме жасап.
2024 жылдың қараша айында Бұланды ауданының полиция бөліміне білім беру мекемесінен екі пневматикалық мылтықтың және автоматтың оқу макеттері ұрланғаны туралы хабар түсті. Бұл факті бойынша сотқа дейінгі тергеу басталып, жедел-іздестіру шаралары нәтижесінде күдікті анықталды.
Тергеу барысында белгілі болғандай, 2024 жылдың шілде айында оқу орнының қару-жарақ бөлмесінде жөндеу жұмыстарын жүргізген ер адам ешкімнің жоқтығын пайдаланып, оқу макеттерін алып кеткен. Біраз уақыттан кейін олардың жоғалғаны анықталып, оқу орнының басшылығы бірден полицияға жүгінді.
Мұндай жағдайлардың қайталануын болдырмау үшін құқық қорғау органдары мекемелерге бөгде адамдардың кіруін бақылауды күшейтуді, ғимараттарды бейнебақылау және дабыл жүйелерімен жабдықтауды, материалдық құндылықтардың есебін қатаң жүргізуді ұсынады. Сондай-ақ жөндеу жұмыстары кезінде мердігер ұйымдардың күзетілетін аймақтарға кіру тәртібін алдын ала келісу маңызды.
Осы қауіпсіздік шараларын сақтау – мүлікті қорғауға және ұрлықтың алдын алуға септігін тигізеді.