Ақмолалықтың WhatsApp-аккаунтын бұзған алаяқтар оның әкесінен 180 мың теңге жымқырды, - деп хабарлайды kazlenta.kz тілшісі Polisia.kz сайтына сілтеме жасап.
Көкшетау қаласының полиция басқармасына жергілікті тұрғын алаяқтыққа ұшырағаны туралы арызданды.
Ер адамның айтуынша, 24 қаңтар күні сағат 13:00 шамасында белгісіз біреулер қызының WhatsApp-тағы аккаунтын бұзып, оның атынан хабарлама жіберген. Қаскүнемдер өзін қызы ретінде таныстырып, шұғыл ақша қажет екенін айтып, нәтижесінде 180 мың теңгені алдап иемденген. Қазіргі таңда аталған факті бойынша сотқа дейінгі тергеу амалдары жүргізілуде.
Мұндай алаяқтық әрекеттерден қорғану үшін киберқауіпсіздік ережелерін қатаң сақтау қажет. Есіңізде болсын, алаяқтар WhatsApp аккаунттарына зиянды сілтемелер арқылы қол жеткізе алады. Егер пайдаланушы мұндай сілтемеге өтсе, алаяқтар оның есептік жазбасын басқарып, туыстары мен достарына алдау мақсатында хабарлама жібере бастайды.
Күдікті сілтемелер көбінесе ұтыс ойындары, сауалнамалар, бонустар немесе басқа да ұсыныстар түрінде таратылады. Бейтаныс ресурстарға жеке деректеріңізді енгізуден аулақ болыңыз.
Егер сізге WhatsApp арқылы танысыңыздан қарызға ақша сұраған хабарлама келсе, оған тікелей қоңырау шалып, жағдайдың рас-өтірігін анықтаңыз. Күдікті әрекеттер байқалған жағдайда, дереу полицияға және WhatsApp қолдау қызметіне хабарласу қажет.