Итальяндық Condé Nast Traveller журналы Алматы мен оның маңайы туралы көлемді мақала жариялады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Журналист Лючия Галли мен фотограф Джакомо Брецель Алматыны Шығыс пен Батыс тоғысқан, дәстүр мен қазіргі заман үйлесім тапқан ерекше орын ретінде сипаттайды. Мақалада Іле-Алатау таулары, Алтынемелдің «Айғайқұмы», су асты орманы бар Қайыңды көлі, Көлсай көлдері және Шарын шатқалы сынды табиғи байлыққа ерекше назар аударылған. Авторлар Панфилов көшесі, Көк базар мен Көктөбеден көрінетін қала көрінісін де көрсеткен. Журнал Алматының гастрономиялық байлығын да айшықтайды. Дәстүрлі қазақ тағамдарынан бастап, неономадтық интерпретацияда ұсынатын заманауи мейрамханалар да қалыс қалмаған.Бұрын CNN Travel да қала туризмінің тартымдылығы туралы жазған болатын. Бұл мақалалар Алматыға деген қызығушылықтың артып келе жатқанын көрсетеді, ол Орталық Азиядағы жаңалықтар мен жарқын әсерді сүйетін туристер үшін болашағы зор бағыттың біріне айналып келеді.