Алматы әкімі Ерболат Досаев Бостандық ауданының Оңтүстік қазандығын жаңғырту және инженерлік желілерді жаңарту барысымен танысты, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
1972 жылы салынған қазандық ұзақ уақыт бойы жаңартуды қажет еткен. Қазіргі уақытта үш ескі қазандық ауыстырылып, төртіншісі жаңартылды. Жаңа сорғы агрегаттары мен газ жабдықтары орнатылып, қазандықтың қуаты сағатына 190 Гкал дейін артты. Жұмыс биыл желтоқсанда аяқталады. Қала басшысы атап өткендей, коммуналдық инфрақұрылымды жаңарту – қала үшін басым міндет.«2025 жылдан бастап біз шағын аудандар мен кварталдардың қажеттіліктерін өтейтін жергілікті қазандықтарды дамытамыз. Бұл әлдеқайда тиімді, себебі магистралды үлкен диаметрлі құбырларды ауыстырудан гөрі желі тарту мен жөндеу жұмыстары әлдеқайда арзан болады», - деді Ерболат Досаев.Алматыда инженерлік желілерді жаңғырту жұмыстары қызған. Биыл 20 км желі қайта құрылды. «АТКЭ» ЖШС-нің 4 қазандығын қайта жаңарту және 81 қазандығын жөндеу аяқталды.