Абай облысында мас күйінде көлік жүргізген жүргізуші полициядан қашпақ болды, – деп хабарлайды kazlenta.kz тілшісі Polisia.kz сайтына сілтеме жасап.
Абай облысы Жарма ауданында мас күйінде болған 49 жастағы жүргізушіні қуғындау оқиғасы орын алды. Заң бұзушы автопатрульдің бірнеше рет тоқтау туралы талабын елемей, жылдамдығын арттырып, қашпақ болды.
Қуғындау барысында жүргізуші бірнеше рет жол ережелерін бұзды: бағдаршамның тыйым салатын белгісіне қарамай өтті, полицияның дыбыстық сигналдарына мән бермей, жоғары жылдамдықпен қозғалды. Бір бұрылыста ол көлік басқаруын жоғалтып, жолдан шығып кетіп, алдыңғы бамперін зақымдады. Заң бұзушыны тек соққыдан кейін іске қосылған қауіпсіздік жастықтары ғана тоқтата алды.
Жүргізуші зардап шеккен жоқ. Медициналық тексеру нәтижелері оның орташа дәрежеде мас күйінде болғанын көрсетті.
Заң бұзушының көлігі коммуналдық тұраққа қойылды, ал жүргізушіге қатысты әкімшілік іс қозғалды. Оған 15 тәулікке дейін әкімшілік қамауға алу және көлік құралдарын басқару құқығынан 7 жылға дейін айыру жазасы қарастырылған. Сонымен қатар, полиция қызметкерлеріне бағынбағаны және жолда қауіпті жағдай туғызғаны үшін қосымша айыптар тағылуы мүмкін.
Полиция ескертеді: Жол – батылдықты сынайтын орын емес. Мас күйінде көлік басқару – тек қылмыс қана емес, барлық жол қозғалысына қатысушылар үшін қауіпті.