Мониторингтік топ Астананың ойын залдары мен компьютерлік клубтары бойынша рейд өткізді, оның барысында бұзушылықтар анықталып, жауапты тұлғалар жауапкершілікке тартылды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Іс-шараға аудандық әкімдіктің, Қалалық полиция департаментінің ювеналды полиция бөлімінің, Білім басқармасының және Астана қаласы әкімдігі жанындағы Әйелдер істері және отбасылық-демографиялық саясат жөніндегі комиссияның өкілдері қатысты. Астана әкімдігі жанындағы Әйелдер істері және отбасылық-демографиялық саясат жөніндегі комиссияның хатшысы Қарлығаш Саркенованың айтуынша, құқық бұзушылықтардың алдын алу және кәмелетке толмаған балалардың құқықтарын қорғау мәселелері комиссияның ерекше бақылауында.Рейд нәтижесінде заңды өкілдерінің еріп жүруінсіз қоғамдық орындарда жүрген 12 жасөспірім анықталды.
Балаларды қараусыз қалдырған ата-аналар ҚР ӘҚБтК-нің 442-бабы 2,3-бөлігі бойынша әкімшілік жауапкершілікке тартылды. Компьютерлік клубтарға да балалардың мекемеде болуына мүмкіндік бергені үшін әкімшілік жаза қолданылды.Рейдтік іс-шаралардың мақсаты – балалар мен жасөспірімдердің қараусыз қалуына қарсы күрес, кәмелетке толмағандар жасаған және оларға қатысты қылмыстардың алдын алу.Айта кетейік, Астана қаласы прокуратурасының, Құқық қорғау және мемлекеттік органдардың үйлестіруімен, Астана қаласы әкімдігі жанындағы Әйелдер істері және отбасылық-демографиялық саясат жөніндегі комиссия мүшелерімен бірлесіп, түнгі уақытта қала көшелерінде және ойын-сауық орындарында кәмелетке толмағандарды анықтау бойынша рейдтер жүргізілуде.Естеріңізге сала кетейік, 442-бап бойынша ҚР Әкімшілік құқық бұзушылық туралы Кодексі 22.00-ден 6.00-ге дейін кәмелетке толмағандардың заңды өкілдерінің еріп жүруінсіз ойын-сауық орындарында өз беттерінше болуына тыйым салынады, сондай-ақ сағат 23.00-ден 6.00-ге дейін кәмелетке толмағандарға заңды өкілдерінің еріп жүруінсіз тұрғын үйден тыс жерде болуға тыйым салынады.