Түркістан облысының полицейлері “Қорғау” бағдарламасы арқылы өтелмеген қарызы мен айыппұлы бар жүргізушілерді анықтады, – деп хабарлайды kazlenta.kz тілшісі Polisia.kz сайтына сілтеме жасап.
Түркістан облысы ПД ЖБО мен патрульдік полиция батальонының қызметкерлері бірлесіп, жол қауіпсіздігін қамтамасыз ету бойынша қызмет атқару кезінде борышкерлер көлігін анықтады.
Нақтырақ айтсақ, Жедел басқару орталығының операторлары “Қорғау” бағдарламасы арқылы Жетісай – Сарыағаш тасжолында өтелмеген қарызы бар ВАЗ-2107 автокөлігін тоқтатты. Тексеру барысында жүргізушінің 4 миллион теңгеден астам несие қарызы мен айыппұлы бар екені белгілі болды.
“Қорғау” бағдарламасы Opel Vectra автокөлігін тоқтату туралы тағы бір дабыл берді, оның жүргізушісі 1 миллион теңгеден астам қарызын төлемеген болып шықты.
Полицейлер жүргізушілерге салынған айыппұлдарды уақытылы төлеу мен жол ережесін бұзбау қажеттілігі туралы түсіндірме жұмыстарын жасады. Автокөліктер айыптұраққа қойылды.
Осы ретте Түркістан облысының полицейлері жол ережесін қатаң сақтап, айыппұлдарды мерзімінен кешіктірмей өтеу керектігін ескертеді.