Қазақстан Республикасы Премьер-Министрінің бірінші орынбасары Роман Скляр Түрікменстан Министрлер Кабинеті Төрағасының орынбасарлары Батыр Атадаевпен және Баймырат Аннамаммедовпен кездесті, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Кездесу аясында Қазақстан мен Түрікменстандағы экономикалық ахуал туралы пікір алмасу, қазақстан-түрікменстан сауда-экономикалық ынтымақтастығының қазіргі жай-күйі мен даму перспективалары, сондай-ақ энергетика саласындағы өзара іс-қимыл талқыланды.
Екі ел де өзара іс-қимылдың барлық спектрі бойынша сауда-экономикалық ынтымақтастықты үдемелі түрде кеңейтуде. Мәселен, 5 жыл ішінде елдер арасындағы өзара сауда көлемі 4 есеге ұлғайды, тек соңғы жылдың өзінде 28%-ға өсті. Биылғы 6 айда тауар айналымы $237,2 млн-ды құрады.
Роман Скляр Қазақстан мен Түрікменстан арасындағы өзара іс-қимыл әріптестік пен тату көршілік рухында дамып келе жатқанын, сондай-ақ екіжақты экономикалық ынтымақтастықты дамытудың үлкен перспективалары бар екенін атап өтті.
Тараптар қабылданған шешімдер қазақстан-түрікменстан өзара іс-қимылының барлық бағыттары бойынша екіжақты қарым-қатынастарды дамытуға қосымша серпін беретініне сенім білдірді.