Ақмола полицейлері түнгі уақытта автотрассаларда өте мұқият болуға шақырады, – деп хабарлайды kazlenta.kz тілшісі Polisia.kz сайтына сілтеме жасап.
Ақмола облысының полиция департаменті облыс тұрғындарына жол жиегімен жүрмеуге, әсіресе тәуліктің қараңғы мезгілінде жақындап келе жатқан көліктің алдына шығып, жолдан өтпеуге қатаң кеңес береді.
Мәселен, 31-шілдеде және 1-тамызда түнгі уақытта автотрассалардың жарықшамдары жоқ учаскелер бойынша қозғалып келе жатқан облыстың екі тұрғыны жол-көлік оқиғаларынан зардап шекті. Жаяу жүргіншілердің бірі қайтыс болды.
Көлік құралдарын басқаратын адамдардың жол жүрісі немесе көлік құралдарын пайдалану ережелерін бұзуы бабы бойынша сотқа дейінгі тергеп-тексеру жүргізіліп жатыр.
Сот-медициналық сараптамалар тағайындалды.
Полицейлер киімге, велосипедке және басқа да заттарға, әсіресе балаларға шағылыстыратын элементтерді қолдану қажеттілігін еске салады.