Шығыс Қазақстанда ШҚО Полиция департаменті қызметкерлері арасында COVID-19-ға қарсы ерікті вакцинация басталды. Өз еркімен екпе алуға дайын полицейлердің тізімі жасалды. Вакцинаны алғашқылардың бірі болып ШҚО ПД бастығы Сағат Мадиев алды, деп хабарлайды kazlenta.kz.
- Жеке құрам үшін үлгі ретінде мен вакцинаны алғашқылардың бірі болып алдым, - деп атап өтті С.Мадиев.
ШҚО бас полицейі қазіргі әлемде екпе егу салауатты өмір салтының маңызды элементіне айналғанын және вакцинацияға жасаған қадамымыз коронавирустық инфекцияның таралуын азайтуға мүмкіндік беретінін атап өтті.
Бүгінгі таңда вакцинацияланғандар тізімінде 100-ден астам адам бар. Олар алдыңғы қатарда тұратын және халықпен жиі қарым-қатынаста болатын патрульдік полиция қызметкерлері мен учаскелік полиция инспекторлары. Айта кетсек, полиция қызметкерлері осы апта ішінде вакцинаны ала алады.