ҚР Экология, геология және табиғи ресурстар министрлігінің климаттық саясат департаменті директорының орынбасары Зүлфия Сүлейменова ҚР Парламенті Мәжілісіне Nur Otan партиясы атынан депутат болатын азаматтар қатарына кірді. Министр Мағзұм Мырзағалиев маманды Twitter парақшасында құттықтады, деп хабарлайды kazlenta.kz.
«Жапониядағы саяси зерттеу институтында докторантурада оқыған, Президенттік жастар кадрлық резервінде болған Зүлфия Сүлейменова Министрлік қабырғасында өзінің біліктілігін барынша көрсете білді. Зүлфия бұған дейін БҰҰ-ның Азия және Тынық мұхиты аймағы үшін әлеуметтік және экономикалық комиссиясында қоршаған ортаны қорғау және даму дивизионында жұмыс істеді»,- деп жазды министр.
З. Сүлейменова қазір ғаламдық жылыну, Қазақстандағы мұздықтар мен ауызсу тапшылығы секілді аса өзекті мәселелерді зерттеп жүр.
«Маман бар тәжірибесін Мәжілісте де халық игілігіне тиімді қолданатынына сенім білдіремін», - деді М.Мырзағалиев.