Қазақстан Республикасы Ақпарат және қоғамдық даму министрлігі тарапынан ұсынылған «Бейбітшілік және келісім» жобасын жүзеге асыру бағытында Шымкент қаласы әкімдігі жанынан ведомствоаралық жұмыс тобы құрылған болатын. Мұндағы мақсат – этноәлеуметтік қақтығыстардың алдын -алу шараларын әзірлеу, негізгі бағыттар бойынша өңірлердің проблемаларын анықтау, нақтылау және оларды шешу.
Сала басшылары мен арнайы мамандардан жасақталған топтар тұрғындар арасында: «Этносаралық келісім», «Әлеуметтік және еңбек проблемаларын шешу», «Халықтың денсаулығы», «Халыққа білім беру», «Бизнес ортаны дамыту», «Конфессияаралық келісім», «Заңдылық, тәртіп және қауіпсіздік» сынды жеті бағыт бойынша қабылдаулар жүргізді.
Қаладағы Әл-Фараби ауданы әкімі аппаратының ұйымдастыруымен, Р.Мырзашев атындағы №76 жалпы орта мектебінің ғимаратында кіші топтар құрамындағы – Шымкент қалалық ішкі саясат және жастар істері, жұмыспен қамту және әлеуметтік қорғау, денсаулық сақтау, білім, кәсіпкерлік және индустриалды-инновациялық даму, дін істері басқармалары мен құқық қорғау органдарының жауапты қызметкерлері тұрғындармен кездесу өткізді. «Бейбітшілік және келісім» жобасы аясында азаматтарды қабылдап, оларды толғандырған мәселелердің шешу жолдарын қарастырды.
Жоба аясында өзге де аудандарда бірқатар іс-шаралар ұйымдастырылып, өңірдегі бейбітшілік пен келісімді нығайту жөніндегі жұмыстардың тиімділігін арттыру мәселелері, отбасы құндылықтарын нығайту, діни тұрақтылықты сақтау мәселелері талқыланды.
18-12-2023, 23:54
Қазақстан халқы Ассамблеясының "Бейбітшілік пен келісім" жобасы аясында тұрғындармен кездесу өтті
Фото: "Ақ Жайық" газеті
Егер мәтінде қате байқасаңыз, оны таңдап, Ctrl+Enter пернелерін басыңыз