13 қыркүйекте Алматыда Орталық Азиядағы қиберқауіпсіздік бойынша KazHackStan жыл сайынғы тәжірибелік конференциясының бірінші күні өтті. Конференцияның алғашқы күні мемлекеттік құрылымдар мен бизнес секторының киберқауіпсіздік саласындағы өзара іс-қимылына бағытталған талқылау мен тәжірибелік воркшоптарға арналды, деп хабарлайды kazlenta.kz.
Конференция Қазақстан Республикасы Цифрлық даму, инновациялар және аэроғарыш өнеркәсібі министрлігі Ақпараттық қауіпсіздік комитетінің қолдауымен ұйымдастырылды.
ҚР ЦДИАӨМ Ақпараттық қауіпсіздік комитеті өткізетін конференция шеңберінде ақпараттық қауіпсіздікті қамтамасыз ету мәселелерінде азаматтарға, бизнес иелеріне және мемлекеттік органдарға кеңес беруге арналған стенд ұйымдастырылды.
Конференцияның алғашқы күні «Қазақстанда және өңірде кибер тұрақтылықты қамтамасыз ету» тақырыбында пленарлық сессия өтті, онда Ақпараттық қауіпсіздік комитетінің төрағасы Руслан Әбдіқалықов сөз сөйледі.
Комитет төрағасы өз сөзінде адами капиталды дамыту және мемлекеттік саясатты жетілдіру, сондай-ақ талаптарды бұзушыларға қатысты қабылданып жатқан шаралар туралы сөз сөйледі.
«Биыл еліміздің киберқауіпсіздігін нығайтуға бағытталған «Киберқалқан-2.0» бағдарламасы іске қосылды. Біз 2025 жылға қарай айтарлықтай нәтиже күтеміз: жаһандық киберқауіпсіздік индексі: топ-20 елге кіру. 2025 жылға қарай біздің мақсатымыз – «Электрондық үкіметті» 100% қорғау. «Киберқалқан-2.0» бағдарламасы елімізді цифрлық әлемде қауіпсіз етуге кепілдікбереді»,- деді Руслан Әбдіқалықов.
KazHackStan - бұл тәжірибе алмасу, ақпараттық және киберқауіпсіздік саласындағы өзекті мәселелерді талқылау және шешу алаңы.Биыл KazHackStan конференциясына 3000-нан астам қатысушы келді. Конференция барысында әртүрлі елдерден келген 30-дан астам спикер сөз сөйлейді.