Премьер-Министрдің орынбасары - Қаржы министрі Ерұлан Жамаубаев «АрселорМиттал» компаниясының Қазақстан нарығынан кетуі туралы сұраққа жауап берді, деп хабарлайды kazlenta.kz тілшісі ҚазАқпарат сайтына сілтеме жасап.
«Менің ойымша, саяси шешім (АрселорМитталдың Қазақстаннан кетуі бойынша – автор түсіндірмесі) бар. Сондықтан да жұмыс істейтін боламыз», - деп жауап берді Ерұлан Жамаубаев БАҚ өкілдерінің сауалына орай.
Сонымен қатар, вице-премьер «АрселорМиттал» меншігін ресейлік «Северсталь» компаниясына беру туралы желіде пайда болған ақпаратқа қатысты түсініктеме бермеді.
«Бұл мәселемен тікелей Роман Скляр айналысады. Егер әркім өз деңгейінде қабілетсіз түсініктеме берсе, бұл дұрыс болмайды. Сонымен қатар, бұл келіссөздер процесіне әсер етуі мүмкін», - деп атап өтті Ерұлан Жамаубаев.
Қоса кетсек, бұған дейін «Қазақстан» шахтасының экс-директоры, қазіргі Мәжіліс депутаты Арман Қалықов «АрселорМиттал Теміртау» елден кетуі тиіс деген пікір білдірген еді.
Еске салайық, «Қазақстан» шахтасында өрт 17 тамыз күні сағат 10:05-те тұтанды.
Апат кезінде жер астында 227 кенші болды. 222 адамды жер бетіне жедел көтеру мүмкін болды, сегізі зардап шекті.
5 жұмысшының тағдыры белгісіз болды. Кейін олардың бірінің денесі табылды.
Қарағандыдағы көмір шахтасында зардап шеккендердің арасында екі адам жансақтау бөліміне жеткізілгені туралы хабарлаған едік.
Айта кетейік, Президент «Қазақстан» шахтасында болған өрт себебін анықтау үшін жан-жақты тергеу жүргізуді тапсырды.