Вашингтон мен Мәскеу делегациялары Эр-Риядта кездесті. Украина АҚШ пен Ресей арасындағы Сауд Арабиясында өтетін келіссөздеріне қатыспайды әрі олардың келісімдерін мойындамайды. Бұл туралы Украина президенті Владимир Зеленский айтты, деп хабарлайды kazlenta.kz тілшісі inbusiness.kz сайтына сілтеме жасап.
"Украина бұл келіссөздерге қатыспайды. Украина туралы Украинаның қатысуынсыз өтіп жатқан қандай да бір келіссөздер нәтиже бермейді. Бұл келісімдерді мойындамаймыз", - деді Владимир Зеленский.
Қазір Украина басшысы Түркияда сапармен жүр.
Ал америкалық және ресейлік делегациялар арасындағы кездесу Эр-Риядта бүгін басталды. АҚШ тарапынан сыртқы істер министрі Марк Рубио мен президенттің ұлттық қауіпсіздік мәселелері бойынша кеңесшісі Майк Уолтц қатысады. Ресейден сыртқы істер министрі Сергей Лавров пен президент көмекшісі Юрий Ушаков барды.