Жамбыл облысында бір түнде 277 жол қозғалысы ережесін бұзу дерегінің жолы кесілді, – деп хабарлайды kazlenta.kz тілшісі Polisia.kz сайтына сілтеме жасап.
Жамбыл облысында “Заң мен тәртіп” қағидатын іске асыру аясында полиция қызметкерлері заңсыз көше жарыстарын, дрифт және басқа да қауіпті әрекеттерді анықтау мен жолын кесуге бағытталған түнгі рейдтік іс-шаралар өткізді. Рейд барысында 277 әкімшілік құқық бұзушылыққа тосқауыл қойылды. Көлік құралын мас күйінде басқарған 6 жүргізуші және көлік құралын басқару құқығы жоқ 21 жүргізуші әкімшілік жауапкершілікке тартылды. Мәселен, Т. Рысқұлов ауданында полиция қызметкерлері жүргізуші куәлігі жоқ және алкогольдік масаң күйде GSX Suzuki мотоциклді басқарған азаматты тоқтатты. Құқық бұзушыға қатысты әкімшілік хаттама толтырылып, мотоцикл айып тұрағына қойылды. Сонымен қатар мемлекеттік тіркеу нөмірлік белгісінсіз немесе белгіленген тәртіппен тіркелмеген көлік құралдарын басқарудың 18 дерегі, сондай-ақ тиісті рұқсатсыз қайта жабдықталған көлік құралдарын пайдаланудың 13 дерегі анықталды.
Авариялық жағдай туғызғаны үшін 5 жүргізуші, ал қарсы қозғалыс жолағына шыққаны үшін 4 жүргізуші жауапкершілікке тартылды. Осындай деректердің бірі Тараз қаласында тіркелді. Жансүгіров көшесінде Hyundai Elantra автокөлігінің жүргізушісі көлік құралын басқару құқығы болмағанына қарамастан қарсы қозғалыс жолағына шыққан. Оған қатысты әкімшілік хаттама толтырылып, автокөлік айып тұрағына қойылды. Жалпы рейдтік іс-шаралар қорытындысы бойынша 59 көлік құралы айып тұрағына қойылды, оның ішінде 9 шетелдік тіркеудегі автокөлік бар.