БҚО-да “Таза Қазақстан” акциясы аясында қазан айының алғашқы онкүндігінде 200-ге жуық құқық бұзушылық анықталды, деп хабарлайды kazlenta.kz тілшісі Polisia.kz сайтына сілтеме жасап.
Батыс Қазақстан облысы полиция департаментінің қызметкерлері "Таза Қазақстан" бастамасы аясында жыл басынан бері өңірде 7000-ға жуық әкімшілік құқық бұзушылық анықтаса, соның 200-дейі қазан айының алғашқы онкүндігінде анықталды. Оның ішінде: белгіленбеген орындарда сауда жасаудың 17 фактісі; ортақ пайдаланылатын орындарды ластаудың 9 фактісі; қалалар мен елді мекендердің аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдірудің 144 фактісі анықталды.
Полиция департаменті жергілікті атқарушы органдармен бірлесіп, қала орталығындағы үлкен базар сыртындағы жайма базарларды реттеу, санитарлық талаптарды сақтау бағытында профилактикалық жұмыстарды жүргізуде. Нәтижесінде базар аумағы тазартылды, адамдар жүретін жолдар мен тротуарлар кеңейтілді. Тұрғындар мен сауда жасаушыларға қолайлы жағдай жасалып, азаматтар тарапынан алғыс айтылуда.