Алматыда жыл соңына дейін Шұғыла және Алтай-1 шағынаудандарында, сондай-ақ Алмалы ауданындағы Әйтеке би көшесінде үш жаңа емхананың құрылысын аяқтау жоспарланған. Әрқайсысы бір ауысымда 500 адамға дейін қабылдай алады. Бұл туралы Алматы қаласы Құрылыс басқармасының өкілдері айтты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жаңа нысандар тұрғындардың медициналық көмекке қолжетімділігін арттырып, қолданыстағы емханаларға түсетін жүктемені азайтады.
Наурызбай ауданындағы Шұғыла шағынауданында салынып жатқан емхананың аумағы 12 мың шаршы метрден асады. Медициналық мекеме екі ауысымда жұмыс істеп, күніне мың адамға дейін қабылдайды.
Мұнда ересектер және балалар бөлімшесі, әйелдер консультациясы, клиникалық-диагностикалық зертхана, функционалдық диагностика және медициналық оңалту бөлімшелері орналасады. Сондай-ақ, 26 орындық күндізгі стационар мен амбулаториялық хирургия орталығы жұмыс істейді.
Тағы бір емхана Алмалы ауданындағы Әйтеке би көшесінде салынып жатыр. Аумағы 8 мың шаршы метрден асатын бес қабатты ғимарат шамамен 30 мың тіркелген тұрғынға қызмет көрсетуге есептелген.
Емханада терапия және педиатрия бөлімшелері, жалпы практика дәрігерлері, әйелдер консультациясы, амбулаториялық хирургия орталығы және күндізгі стационар жұмыс істейді. Сонымен қатар тұрғындарға медициналық оңалту, стоматология, офтальмология, оториноларингология және онкология бағыттары бойынша қызмет көрсетіледі.
Үшінші емхана Түрксіб ауданындағы Алтай-1 шағынауданында бой көтеріп жатыр. Аумағы шамамен 10 мың шаршы метр болатын нысан екі ауысымда жұмыс істеп, тәулігіне мың науқасқа дейін қабылдай алады.
Мұнда жалпы практика дәрігерлері мен тиісті мамандардың кабинеттері орналасқан Отбасылық денсаулық орталығы жұмыс істейді. Бұдан бөлек, Жастар денсаулық орталығы, профилактика және әлеуметтік-психологиялық көмек бөлімшесі, сондай-ақ күндізгі стационар қарастырылған.
Үш нысанда да науқастар санын бөлу, жеке кіреберіс, сондай-ақ ерекше қажеттілігі бар адамдарға арналған жеделсаты мен пандус болады.