Алматы қаласы әкімінің орынбасары Абзал Нүкенов азаматтарды жеке мәселелері бойынша кезекті қабылдау өткізді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Кездесу барысында білім беру, мәдениет, спорт және қоғамдық бастамаларды дамытуға қатысты өзекті мәселелер қаралды. Қала тұрғындары бұқаралық спортты дамыту, халықаралық іс-шараларды өткізу, мәдени және шығармашылық жобаларды жүзеге асыру, білім беру жүйесін жетілдіру және мемлекеттік тілді қолдау бойынша ұсыныстарын жеткізді. Сонымен қатар, тарихи-мәдени мұраны сақтау және естелік бастамаларды іске асыруға байланысты мәселелер көтерілді.
Кездесу барысында балалардың құқықтарын қорғау, қауіпсіз әрі қолайлы білім беру ортасын қамтамасыз ету, сондай-ақ бейінді мекемелер жұмысының жауапкершілігі мен тиімділігін арттыру мәселелеріне ерекше назар аударылды. Қарастырылған барлық өтініштер мен ұсыныстар жұмысқа қабылданды. Әрбір мәселе бойынша салалық басқармалар мен жауапты құрылымдарға тиісті тапсырмалар берілді. Сонымен қатар, бірқатар мәселелер бойынша нақты қолдау шараларын пысықтау тапсырылды.