Алматыда ішкі құндылықты дамыту және отандық өндірушілерді қолдауға арналған кездесу өтті. Талқылау барысында қазақстандық компаниялардың қалалық жобаларды жүзеге асыруға кеңінен қатысуы, сондай-ақ жергілікті өндіріс өнімдердін пайдалануға баса назар аударылды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Іс-шара Алматы қаласы әкімінің мегаполис ұйымдарының сатып алу жүйесінде ішкі құндылықты дамыту жөніндегі жұмыс тобын құру туралы өкімін іске асыру аясында ұйымдастырылды.
Кездесу барысында бюджеттік бағдарламалардың әкімшілері отандық өнімге деген қажеттілік тізбесі көрсетілген жылдық жоспарын ұсынды. Сонымен қатар қалалық инфрақұрылымды дамытуға қатысты жоспар айтылып, көшені көріктендіруден бастап қоғамдық кеңістіктер мен спорт саябақтарын құруға дейінгі жобалар белгіленді.
Мұндай кездесулер алдағы уақытта тұрақты түрде өтетіні атап өтілді. Осылайша, бұған дейін уақытша тоқтатылған ішкі құндылықты дамытуға бағытталған жұмыс қайта жанданып, жүйелі форматта жолға қойылады.