Үкіметте Ұлытау облысының әлеуметтік саласын дамытуға қатысты мәселелер талқыланды. Жиында Қазақстан Республикасы Премьер-министрінің орынбасары – мәдениет және ақпарат министрі Аида Балаева аталған мәселелерді жан-жақты әрі терең пысықтау қажет екенін атап өтті, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Талқылауға салалық министрліктердің басшылары, сондай-ақ Ұлытау облысының әкімі Дастан Рыспеков қатысты.
Жиын барысында денсаулық сақтау, мектепке дейінгі, орта, техникалық және кәсіптік білім беру, жоғары білім мен ғылым салаларындағы өзекті әрі проблемалық мәселелер кеңінен қаралды. Сонымен қатар еңбек және халықты әлеуметтік қорғау бағытына ерекше назар аударылды. Бұдан бөлек, бұқаралық спортты дамыту, спорт инфрақұрылымының қолжетімділігін арттыру жайы айтылды. Өңір халқының өмір сапасын жақсарту мен облыс экономикасын әртараптандырудың маңызды тетігі ретінде туризмді дамыту мәселелері зерделенді.
Кеңес қорытындысында Қазақстан Республикасы Мәдениет және ақпарат министрлігі бағыты бойынша облыстағы мәдениет объектілерінің инфрақұрылымын дамыту, креативті индустрияны қолдау, жастар саясатын жүзеге асыру және азаматтық қоғам институттарымен өзара іс-қимылды нығайтуға қатысты бірқатар мәселелер қозғалды.
Отырыс барысында өңірдің әлеуметтік саласында қордаланған проблемалық мәселелер кешені айқындалып, олардың жедел әрі жүйелі шешім қабылдауды талап ететіні атап өтілді.
Премьер-министрдің орынбасары аталған мәселелерді облыс әкімдігі тарапынан орталық мемлекеттік органдармен бірлесіп егжей-тегжейлі пысықтап, оларды шешуге бағытталған нақты іс-шаралар жоспарын әзірлеу қажет екенін айтты.