Алматы әкімі Дархан Сатыбалды Orascom Investment Holding холдингінің төрағасы Нагиб Савириспен кездесті. Кездесу барысында туризмді дамыту, кәсіпкерлікті қолдау және инвестициялық ынтымақтастықты кеңейту мүмкіндіктері талқыланды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Дархан Сатыбалды Алматының халықаралық және экономикалық маңызы зор орталық екенін атап өтті. Қала 130-дан астам елмен ынтымақтастық орнатып, мұнда 115 халықаралық ұйымның өкілдігі жұмыс істейді. Сонымен қатар Қазақстандағы екінші деңгейлі банктердің 90%-ының бас кеңселері Алматыда шоғырланған.
Қала ел экономикасының 22%-дан астамын, республикалық бюджетке түсетін салық түсімдерінің төрттен бірінен астамын қамтамасыз етеді. Кездесуде туризм саласына ерекше назар аударылды. Соңғы үш жылда туристер саны 92%-ға артты, ал жоғары маусымда қонақүйлердің жүктемесі 90%-ға дейін жетеді.Кездесу қорытындысы бойынша Нагиб Савирис Алматының инвестициялық әлеуетін одан әрі зерделеуге және диалогты жалғастыруға қызығушылық білдірді.