ҚР Мәдениет және ақпарат министрі Аида Балаева Жамбыл облысына жұмыс сапары аясында жергілікті тұрғындармен және бұқаралық ақпарат құралдарының өкілдерімен кездесті, деп хабарлайды kazlenta.kz тілшісі Жамбыл облысы әкімдігінің баспасөз қызметіне сілтеме жасап.
Кездесу барысында министр ақпарат және мәдениет салаларында атқарылып жатқан жұмыстарды баяндады. Ақпарат саласына тоқтала келе, елімізде 4900-ден астам бұқаралық ақпарат құралы жұмыс істейтінін атап өтті. Сондай-ақ, «Масс-медиа» заңының ерекшеліктерін түсіндіріп, әлеуметтік желідегі жарнама мен блогерлердің қызметі заңмен реттелгенін айтты. Аида Балаева жалған ақпарат таратушылар көбейгенін, соңғы уақытта 200 мыңға жуық жалған дерек анықталғанын жеткізіп, халықты сенімді дереккөздерге сүйенуге шақырды. Мәдениет саласында министрлік қызметтерді цифрландыруға басымдық беріп отыр. «E-muzeum» порталы арқылы 65 мыңнан астам экспонат пен 275 жәдігер жайлы мәлімет қолжетімді болды. Ал «Е-архив» жүйесі бойынша 2 миллионнан астам құжат цифрлық форматқа көшірілді. Сонымен қатар Айша бибі және Қарахан кесенелерінде көрсетілетін қызметтерді толық цифрландыру жұмыстары басталды.
Жиын барысында мәдениет үйін салу, әдеби кітаптар шығару, қолөнершілерді қолдау сынды мәселелер көтерілді. Министр тұрғындардың ұсыныстарын тыңдап, жеке бақылауына алды. Сапар аясында Аида Балаева азаматтарды жеке қабылдап, жергілікті БАҚ өкілдерімен де кездесті.