Алматы әуежайында тәртіп бұзған жолаушы жауапқа тартылды, - деп хабарлайды kazlenta.kz тілшісі Polisia.kz сайтына сілтеме жасап.
Алматы әуежайында халықаралық рейс барысында қоғамдық тәртіпті бұзған жолаушы ұсталды. Атап айтқанда, 28 мамыр күні Сеул–Алматы бағытындағы әуе рейсінде Түркістан облысының 23 жастағы тұрғыны ұшу кезінде тәртіпке бағынбай, ұшақ бортында бейәдеп сөздер айтып, экипаж мүшелерінің заңды талаптарын орындаудан бас тартқан. Жолаушының агрессивті әрекеттері ұшақ қонған соң Алматы әуежайындағы желілік полиция бөлімінің қызметкерлерінің араласуымен тоқтатылды. Ол қолданыстағы заңнамаға сәйкес ұсталып, жауапқа тартылды. Әуе компаниясы өкілдері құқық бұзушының әрекеттерін арнайы актімен рәсімдеді.
Нәтижесінде азаматшаға қатысты шара қолданылды. Көліктегі полиция департаментінің дерегінше, жыл басынан бері әуе рейстері кезінде жасалған түрлі құқықбұзушылықтар бойынша 207 адам жауапқа тартылған. Олардың ішінде 127 жағдай – қоғамдық орындарда мас күйінде болу және ішімдік ішу, 50 – ұшақта темекі шегу, 13 – ұсақ бұзақылық, қалғандары – өзге де тәртіп бұзушылықтар. Полиция жолаушылардан ұшу кезінде экипаждың талаптарын мүлтіксіз орындауды және борттағы тәртіп ережелерін сақтауды сұрайды, өйткені мұндай әрекеттер бүкіл рейстің қауіпсіздігіне қауіп төндіруі мүмкін.