Ішкі істер министрі Марат Ахметжанов Семейдегі орман өрті бойынша қылмыстық іс қалай жүргізілетінін түсіндірді, деп хабарлайды kazlenta.kz тілшісі ҚазАқпарат сайтына сілтеме жасап.
«Семей өрті бойынша тергеу жүріп жатыр. Мемлекет басшысының тапсырмасымен қылмыстық іс жүргізуді Бас прокуратура өз жауапкершілігіне алды. Яғни тергеуді прокурорлар жүргізіп жатыр, солардан толығырақ ақпарат ала аласыздар. Әділдік үшін өрттің неден туындағаны жөнінде барлық нұсқалар қарастырылады деп ойлаймын», - деді Ішкі істер министрі Марат Ахметжанов тілшілер сұрағына жауап бере отырып.
Оның айтуынша, ІІМ күштері апат орнында тұрғындарды эвакуациялауға қатысты, тонаушылық пен өзге де қылмыстардың алдын алу үшін күзет ұйымдастырылған.
«Бұл жұмыстарға облыстағы қызметкерлеріміз бен Ұлттық ұлан бөлімшелері қатысуда. Жүзден астам жедел әрекет ету қызметкерлері жұмыс істеп жатыр», - деді Марат Ахметжанов.
Бұған дейін хабарлағанымыздай, Абай облысында өрт маңындағы ауылдарда мородерлікке жол бермес үшін ҚР Ұлттық ұланы «Шығыс» өңірлік қолбасшылығының 100-ге жуық сарбазы көмекке аттанды.