Петропавл қаласының прокурорлары жер заңнамасын бұзудың фактілерін анықтаған. Нәтижесінде, мемлекетке жалпы құны 172 миллион теңге болатын 6,8 га жер қайтарылды, деп хабарлайды kazlenta.kz тілшісі Qazaqstan Media сайтына сілтеме жасап.
Петропавл қаласының прокурорлары жер заңнамасының сақталуын қадағалау үшін жергілікті атқарушы органдардың қызметін тексерген. Нәтижесінде өрескел заңбұзушылықтар анықталды.
«Коммерциялық мақсаттар үшін жер учаскесін беру кезінде уәкілетті органдар қолданыстағы ережелерді елемей, пайдалану үшін беруге жатпайтын ауданы 0,0150 га жер учаскесінің бір бөлігін заңсыз берді. Мәселен, Петропавл қаласы прокурорының актісі бойынша аукционнан тыс берілген жалпы құны 172 миллион теңге болатын 6,8 га жер учаскесі мемлекетке қайтарылды», – делінген облыстық прокуратураның баспасөз қызметінің хабарламасында.
Тағы 69 жер пайдаланушысы жер учаскелерін сатып алу-сату шарттары бойынша сомаларды төлеу жөніндегі шарттық және салық міндеттемелерін орындамаған. Аталған фактілер бойынша мемлекетке 119 млн теңге өндіріліп алынды.