Мемлекет басшысы Қасым-Жомарт Тоқаев күзде кезектен тыс президент сайлауын өткізуді ұсынды. Бұл туралы президент Қазақстан халқына жасаған Жолдауында айтты, деп хабарлайды kazlenta.kz
Қасым-Жомарт Тоқаев өз өкілеттік мерзімін қысқартуға және кезектен тыс президент сайлауына қатысуға дайын екенін айтты. Сонымен қатар мемлекет басшысы президент мандатын 7 жылдық бір мерзіммен шектеуді ұсынды.
"Мен биылғы күзде кезектен тыс президент сайлауын өткізуді ұсынамын. Әділетті Қазақстанды құру жолында түбегейлі және жан-жақты реформаларды табысты жүзеге асыру үшін халықтың жаңа сенім мандаты қажет. Мен үшін мемлекет мүддесі бәрінен биік. Сондықтан мен өкілеттік мерзімімді қысқартуға және кезектен тыс Президент сайлауына баруға дайынмын.
Сондай-ақ, мен көп ойланып, Президент өкілеттігі мерзімдерінің санын және ұзақтығын қайта қарау қажет деген байламға келдім. Президент мандатын ұзақтығы 7 жылдық бір мерзіммен шектеуді ұсынамын. Бірақ қайта сайлануға тыйым салынады", - деді ол.
1-09-2022, 12:56
Президент күзде кезектен тыс президент сайлауын өткізуді ұсынды
Егер мәтінде қате байқасаңыз, оны таңдап, Ctrl+Enter пернелерін басыңыз