Халықтан қаруды сатып алу бойынша акцияның бірінші күнінде полицияға 100-ден астам қару тапсырылды, – деп хабарлайды Polisia.kz.
Қоғамдық қауіпсіздікті қамтамасыз ету деңгейін арттыру мақсатында ІІМ 25 сәуірден бастап халықта заңсыз сақталудағы атыс қаруын, оқ-дәрілер мен жарылғыш заттарды сатып алу бойынша республикалық акция өткізеді.
<!--more-->Қару-жарақ заттарын ерікті түрде тапсырғаны үшін республикалық бюджеттен қарудың әр бірлігіне оның техникалық жай-күйіне байланысты сомасы 10-нан 100-ге дейінгі АЕК көлемінде төлем көзделген.
<!--more-->Акцияның алғашқы күні полицияға ерікті түрде 109 атыс қаруы тапсырылды. Соның ішінде 20 шолақ мылтық, 88 тегіс ұңғылы, бір травматикалық және шолақ мылтыққа арналған 3,5 мың оқ-дәрі тапсырылды. Барлық қару-жарақ түрлері ІІМ-нің тіркеуі негізінде тексеріліп, криминалдық сараптамалардан өткізіледі.
<!--more-->Қару-жарақ заттарды қабылдау әрбір аумақтық полиция органдарында жүргізілетін болады.
– Жарақаттанудың алдын алу мақсатында табылған жарылғыш материалдармен және оқ-дәрілермен ешқандай іс-қимыл жасамауды, ешбір жағдайда оларды тасымалдауға тырыспауды, бұл туралы кез келген полиция бөлімшесіне, оның ішінде 102 нөміріне немесе 112 нөміріне телефон арқылы хабарлауды сұраймыз. Ерікті түрде тіркелмеген атыс қаруы, оқ-дәрілерді және жарылғыш заттарды тапсырған адамдар қылмыстық және әкімшілік жауапкершілікке тартылудан босатылады, – деді ведомствода.
ІІМ өткізілетін акцияға тұрғындардың қолдау білдіретініне және оған белсенді қатысатынына сенім білдіреді.
Анықтама: Ішкі істер министрлігі 2008 жылдан бастап халықтан заңсыз сақталған қару-жарақты сатып алу бойынша 11 республикалық акция өткізді. Бұл мақсатқа республикалық бюджеттен қажетті қаржы бөлінеді.
Барлық акциялар барысында (2008, 2012-2015, 2016-2021) халық өтеулі негізде 54 мыңнан астам атыс қаруы мен ойық ұңғылы қарудың 2 млн.астам патрондарын өз еркімен тапсырды.