Грекияның Салоники қаласында самбодан жастар арасындағы әлем чемпионаты өтіп жатыр. Бүгін бәсекенің екінші күні 10 салмақта жүлде жинытығы сарапқа салынды, деп хабарлайды kazlenta.kz.
Қазақстандық спортшылардың нәтижесі төмендегідей:
Ерлер арасында 88 келідегі Құдірет Досымов ақтық сында ресейлік Максим Мержляковқа, қыздар арасында (59 кг) Ақтоты Зәріп украиналық София Бординскихке есе жіберіп, күміс жүлдегер атанды.
Сонымен қатар ерлер арасында Нұрым Қайроллин (58 кг), Есентай Имаханов (64 кг), қыздар арасында Айкүн Рахметова (50 кг), Әлпеш Изенбай (54 кг), Анель Қайратқызы (65 кг) қола медальге ие болды.
Кеше, әлем чемпионатының алғашқы күні қазақстандық самбошылар 3 жүлдеге қол жеткізген еді. Аман Бақытжан 58 келіде ақтық сында украиналық Максим Бабичтен басым түсіп, чемпион болды. Ал Нурилә Асанқызы (+80 кг) мен Алдияр Қарағұлов (53 кг) үшінші орын алды.
Айта кетейік, әлемнің 30-дан астам мемлекетінен спортшы келген бәсеке 17 қазанда аяқталады.