БҚО-да есірткі заттарын сатумен айналысқан интернет-дүкеннің қызметі тоқтатылды, деп хабарлайды kazlenta.kz тілшісі Polisia.kz сайтына сілтеме жасап.
"Қарасора-2026" жедел-профилактикалық іс-шарасы аясында Батыс Қазақстан облысы полиция департаментінің есірткі қылмыстарына қарсы іс-қимыл басқармасының қызметкерлері "Бүркіт" арнайы мақсаттағы бөлімшесінің қызметкерлерімен бірлесіп, өңір аумағында есірткі заттарын сату және сақтау ісіне қатысы бар интернет-дүкеннің қызметін тоқтатты. Жедел-іздестіру іс-шаралары барысында Орал қаласының 39 жастағы тұрғыны, интернет-дүкеннің иесі ұсталды.
Тұрғылықты мекенжайы бойынша санкцияланған тінту жүргізу кезінде өсімдік тектес зат салынған бес орама, қарасора тұқымдасына жататын өсімдік тұқымдары, iPhone 13 телефоны тәркіленді. Сонымен қатар саяжай аумағын тінту барысында шаруашылық сарайда фитозертхана ретінде жабдықталған бөлме анықталды. Онда қарасора тұқымдасына жататын бес түп өсімдік, сондай-ақ өсімдіктерді өсіруге арналған жабдықтар мен заттар: желдеткіш, жарықтандыру шамдары, екі ауа сорғыш құрылғы, температура датчиктері және тыңайтқыштар табылып, тәркіленді. Аталған факті бойынша сотқа дейінгі тергеп-тексеру басталды. Қазіргі уақытта істің барлық мән-жайын анықтауға бағытталған қажетті тергеу әрекеттері жүргізілуде. Қолданыстағы заңнамаға сәйкес бұл әрекет үшін кінәлінің мүлкі тәркілене отырып, бес жылдан сегіз жылға дейін бас бостандығынан айыру жазасы көзделген.