Астанада полиция департаментінің жылдам қимылдайтын арнайы жасағының қызметкері биіктіктен құлаудың алдында тұрған қызды құтқарып қалды, деп хабарлайды kazlenta.kz тілшісі Polisia.kz сайтына сілтеме жасап.
Полиция қызметкері Еламан Тішпаев түскі уақытта үйіне келген. Жаттығуға шығуға дайындалып жатқан кезде, үйдің маңына адамдардың жиналғанын байқайды. Куәгерлер ғимараттың жоғарғы қабаттарының бірінде балконда қыздың отырғанын айтқан. Полицей бірден подъезге кіріп, 12-қабатқа көтерілді. Балконның шетінде отырған қызды көріп, жағдайды бағалаған ол абайлап арт жағынан жақындады. Қолайлы сәтті пайдаланып, қызды ұстап алып, балконның шетінен қауіпсіз жерге шығарды. Одан кейін ЖҚАЖ қызметкері жедел қызметтер келгенге дейін қыздың жанында болып, оны медицина қызметкерлеріне тапсырды.
Полиция қызметкерінің дер кезінде әрі батыл әрекет етуінің арқасында қайғылы жағдайдың алдын алуға мүмкіндік туды. Бұл оқиға полиция қызметкерлерінің азаматтарға көмек көрсетуге кез келген уақытта дайын екенін тағы бір мәрте көрсетті. Тәртіп сақшылары қызметтік міндеттерін атқару кезінде де, күнделікті өмірде де адамдардың қауіпсіздігіне бейжай қарамайды.