Қызылорда облысында мас жүргізуші 15 тәулікке қамауға алынды, деп хабарлайды kazlenta.kz тілшісі Polisia.kz сайтына сілтеме жасап.
Қызылорда облысының Арал ауданында полиция қызметкерлері көлігіне жалған нөмір тағып, мас күйінде көлік басқарған жүргізушіні анықтады. Кезекті рейдтік шара барысында патрульдік полиция инспекторлары түнгі уақытта күдік тудырған ВАЗ автокөлігін тоқтатып, жүргізушінің жеке басын анықтады. Ол 32 жастағы жергілікті тұрғын болып шықты.
Тексеру барысында көлік құралын басқарған жүргізушінің масаң күйде болғаны анықталды. Бұдан бөлек оның көлікке жалған нөмір таққандығы белгілі болды. Осы заң бұзушылық үшін ол аудандық соттың қаулысымен 15 тәулікке әкімшілік қамауға алынып, жеті жыл мерзімге көлік басқару құқығынан айырылды. Автокөлік айып тұрағына қойылды. Полиция азаматтарға көлік құралдарын басқару кезінде жол қозғалысы талаптарын қатаң сақтап, мас күйде рөлге отырмауды ескертеді.