ҚР ІІМ ҚАЖК-нің РММ №63 мекемесінде мекеме қызметкерлері тыйым салынған затты мекеме аумағына беруге әрекет жасаудың жолын кесті, деп хабарлайды kazlenta.kz тілішсі Polisia.kz сайтына сілтеме жасап.
Оқиға сәлемдемелерді қабылдау бөлмесінде тексеру іс-шараларын жүргізу барысында орын алған. Сотталғандарға беруге арналған азық-түлік өнімдерін тексеру кезінде қызметкерлер нан-тоқаш өнімінің ішіне мұқият жасырылған ұялы телефонды анықтады. Мекеме қызметкерлерінің мұқияттылығы мен қырағылығының арқасында тыйым салынған зат мекеме аумағына берілгенге дейін дер кезінде анықталып, тәркіленді. Аталған факті бойынша тексеру жүргізілуде.
Оқиғаның мән-жайлары және тыйым салынған затты беруге әрекет жасаған тұлғалар анықталуда. ҚР ІІМ ҚАЖК-де атап өткендей, белгіленген талаптарды сақтау және тексеру іс-шараларын сапалы жүргізу қылмыстық-атқару жүйесі мекемелеріндегі режим мен қауіпсіздікті қамтамасыз етудің маңызды құрамдас бөлігі болып табылады. Мекеме қызметкерлері тыйым салынған заттарды мекеме аумағына өткізу әрекеттерінің алдын алу және жолын кесу бойынша жұмысты тұрақты түрде жүргізуде. Бұл ретте қызметкерлердің қырағылығы мен тексеру іс-шараларының сапасына ерекше көңіл бөлінеді.