Ақтөбе облысындағы қылмыстық-атқару жүйесі мекемесінде сотталған адамға тыйым салынған зат жеткізуге жасалған екі әрекеттің жолы кесілді. Соның бірі – телефонды донердің ішіне жасырып өткізу әрекеті, - деп хабарлайды kazlenta.kz тілшісі Polisia.kz сайтына сілтеме жасап.
10 тамызда №8 мекемеде Қазақстан Республикасы ІІМ Ұлттық ұланының 6655 әскери бөлімінің әскери қызметшілері мен мекеменің режим және жедел бөлімдерінің қызметкерлері бірлесіп, "Тосқауыл" режимдік-профилактикалық іс-шарасын өткізді. Тексеру барысында сағат 15:50 шамасында мекеме қызметкерлері ЖШС жүргізушісінің шалбарының қалтасынан 20 мың теңге көлеміндегі ақша қаражатын анықтады. Ақша тәркіленді. Арада көп уақыт өтпей, сағат 16:30 шамасында тағы бір азамат жеткізген сәлемдемені тексеру кезінде азық-түлік арасынан донер анықталды. Мұқият тексеру барысында оның ішіне жасырылған телефон табылып, тәркіленді. Телефонның сотталған адамға арналғаны анықталды.
Аталған факті бойынша Қазақстан Республикасы Әкімшілік құқық бұзушылық туралы кодексінің 481-бабының 1-бөлігі бойынша әкімшілік материал толтырылып, процессуалдық шешім қабылдау үшін сотқа жолданды. ҚАЖ мекемесінің қызметкерлері тыйым салынған заттарды ішке кіргізуге жол бермеу мақсатында режимдік бақылау шараларын тұрақты түрде жүргізіп келеді. Мекеме басшылығы азаматтарды ҚАЖ мекемелеріне барған кезде белгіленген талаптарды қатаң сақтауға шақырады. Сотталғандарға тыйым салынған заттарды беруге немесе жеткізуге жасалған әрекеттер заңнамаға сәйкес жауапкершілікке әкеп соғады.