Қала күні аясында 18 қыркүйекте Алматыда «Almaty: Bala.Art – Мың бала» атты ауқымды қалалық балалар пленэрі өтеді. Бірегей шығармашылық жоба бір алаңда 1000 жас суретшіні біріктіреді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Іс-шара сағат 15:00-дан 17:00-ге дейін Достық даңғылы, 124 мекенжайындағы Оқушылар сарайының алдында өтеді. «Almaty: Bala.Art – Мың бала» – Алматы қаласы Білім басқармасының жаңа мәдени-білім беру жобасы. Жоба балалардың көзімен мегаполистің тарихын, мәдениетін және заманауи келбетін көрсетуге бағытталған. Бір мезетте мың жас алматылық туған қаласына арналған көркем туындылар жасайды.
Балалардың шығармашылық жұмыстарына Алматының тарихы мен қаланың түрлі бейнелері арқау болады. Қатысушылар Ұлы Жібек жолы мен Алтын адам, Алматының көне көшелері, әйгілі апорт, тау шыңдары, субұрқақтар мен гүлзарлар, заманауи мегаполис және болашақ Алматы тақырыптарын туындыларында бейнелейді.
Жоба екі кезеңнен тұрады. 10–15 қыркүйек аралығында қатысушылар үшін тақырыптық шебердің сабақтары өткізіледі. Жұмыс «50/50» форматында орындалады: жас суретшілер эскиз бен фонды алдын ала дайындап, туындыларын 18 қыркүйекте өтетін ауқымды қалалық пленэр барысында аяқтайды.
Іс-шараның басты оқиғаларының бірі «Қазақстандағы ең ауқымды балалар пленэрі» ұлттық рекордын ресми тіркеу рәсімі. Бір мезетте 1000 баланың қатысуы жобаның Қазақстан рекордтар кітабына (КИнЭС) енуіне мүмкіндік береді.
Қала тұрғындары мен қонақтары үшін «Туған күніңмен, сүйікті Алматы!» атты мерекелік концерттік бағдарлама да дайындалған.
Іс-шараның шарықтау шегі Алматы балалық шақ әнұранының тұсаукесері болмақ. Жаңа туындыны құрама балалар хоры мен пленэр қатысушылары бірге орындайды.
Пленэр соңында балалардың қатысуымен символдық композиция жасалады: жас суретшілер «Almaty: Bala.Art – Мың бала» символикасы бейнеленген үлкен матаны жаяды. Ол балалар шығармашылығын, бірлік пен туған қалаға деген сүйіспеншілікті бейнелейді.
Өтетін күні: 18 қыркүйек 2026 жыл
Уақыты: 15:00-17:00
Өтетін орны: Достық даңғылы 124, Оқушылар сарайының алаңы