Алматыда Абай күніне орай ұлы ақын, ойшыл әрі ағартушы Абай Құнанбайұлының ескерткішіне гүл қою рәсімі өтті, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Іс-шараға Алматы әкімі Дархан Сатыбалды, зиялы қауым өкілдері, мәслихат депутаттары, Қоғамдық кеңес мүшелері, Ұлттық ғылым академиясының, Қазақстан Жазушылар одағының, Мұхтар Әуезов атындағы Әдебиет және өнер институтының, білім беру саласының өкілдері мен жастар қатысты.
Рәсім соңында Қазақстанның халық артисі Болат Әбділманов «Абайдың жұмбағы» монологын орындады. Алматыда Абайдың өмірі мен шығармашылығына арналған тақырыптық іс-шаралар өтіп жатыр. Өткен сенбіде 20 мыңнан астам қала тұрғыны мен қонағы «Абай әлемі» музыкалық кешіне қатысты. Бүгін де қаланың кітапханалары, музейлері, жастар комьюнити орталықтары мен басқа да мәдени алаңдарда Абай шығармашылығына арналған түрлі іс-шаралар жалғасып жатыр.