Алматыда ауысымына 350 адам қабылдайтын заманауи емханасы бар, 250 орынға арналған жаңа көпбейінді онкологиялық орталықтың құрылысы жоспарланып отыр. Жоба мемлекеттік сараптаманың оң қорытындысын алды. Бұл оны іске асырудың келесі кезеңіне өтуге мүмкіндік береді. Бұл туралы Алматы қаласы әкімінің орынбасары Нұрлан Әбдірахымның төрағалығымен өткен 2026 жылдың бірінші жартыжылдығының қорытындысы бойынша алқа отырысында Алматы қаласы Қоғамдық денсаулық сақтау басқармасының басшысы Марат Пашимов мәлімдеді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жаңа орталық қаладағы ең заманауи медициналық мекемелердің біріне айналады. Мұнда науқастар онкологиялық көмектің толық спектрін – ерте диагностикалаудан бастап жоғары технологиялық емдеуге және кейінгі оңалтуға дейін ала алады.
Орталық құрамында 250 орынға арналған тәулік бойы жұмыс істейтін стационар, химиотерапия жүргізуге арналған 80 орындық күндізгі стационар, консультациялық-диагностикалық емхана, сәулелік терапия және химиотерапия бөлімшелері, роботтандырылған хирургиямен жабдықталған заманауи операциялық блок, жансақтау және қарқынды терапия бөлімшесі, эндоскопиялық және трансфузиологиялық орталықтар қарастырылған.
Диагностикаға ерекше назар аударылады. Орталық жоғары дәлдіктегі зерттеулер жүргізуге мүмкіндік беретін заманауи клиникалық-диагностикалық, молекулалық-генетикалық және патоморфологиялық зертханалармен жабдықталады. Онда онкологиялық ауруларды ерте кезеңде анықтап, емдеудің ең тиімді әдістерін таңдауға мүмкіндік беретін зерттеулер жүргізіледі. Сондай-ақ жоба цифрлық медициналық архивті, ахуалдық орталықты және ісікке қарсы препараттарды автоматтандырылған жүйе арқылы дайындайтын госпитальдық фармация бөлімшесін құруды көздейді.
Жобаны іске асыру жоғары технологиялық онкологиялық көмек көрсету мүмкіндігін едәуір кеңейтіп, диагностика мен емдеудің заманауи әдістерінің Алматы тұрғындары үшін қолжетімділігін арттыруға және қаланың онкологиялық қызметін жаңа деңгейге көтеруге мүмкіндік береді.
Жаңа онкологиялық орталықтың құрылысымен қатар, Алматыда денсаулық сақтау жүйесін дамытуға бағытталған ірі жобаларды іске асыру жалғасуда.
Қазіргі уақытта қалада 10 нысанның құрылысы жүргізіліп жатыр. Олардың қатарында №7 қалалық клиникалық аурухананы қайта жаңғырту, екі перзентхананың, бес емхананың құрылысы, №16 қалалық емхананы және №2 қалалық балалар клиникалық ауруханасының қосымша ғимаратын сейсмикалық күшейту жұмыстары бар.
Тағы 12 нысан бойынша жобалық-сметалық құжаттама әзірленуде, ал құрылыс-монтаж жұмыстарын 2027 жылы бастау жоспарланған.
Денсаулық сақтау нысандарына күрделі жөндеу жұмыстары да жалғасуда. 2026 жылы үш нысандағы жұмыс толық аяқталды, тағы екі нысанда жұмыс аяқталу сатысында.
Сонымен қатар тағы 10 нысанға күрделі жөндеу жүргізуге дайындық жұмыстары жалғасып жатыр. Оның ішінде бес нысан бойынша мемлекеттік сараптаманың оң қорытындысы алынды, қалған бес нысан бойынша оң қорытындыны биылғы тамыз–қыркүйек айларында алу жоспарланып отыр.