Алматы әкімі Дархан Сатыбалды Н. Сац атындағы балалар мен жасөспірімдер театрын қайта жаңғырту және қосалқы нысанның құрылыс барысымен танысты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Шаһардың маңызды мәдени нысандарының біріндегі құрылыс жұмыстары аяқталып келеді. Ғимараттың көтергіш құрылымдары толық күшейтіліп, шатыры, қасбеті мен инженерлік желілері жаңартылды. Сондай-ақ, заманауи театр жабдықтары орнатылды. Жаңғырту барысында ғимараттың тарихи келбетін сақтауға баса назар аударылды.
Театрдың жаңа корпусы да бой көтерді. Онда қосымша көрермен залы, грим бөлмелері, шеберханалар мен декорация сақтауға арналған орындар болады. Барлық жұмысты жаз соңына дейін аяқтау жоспарланған. Осыдан кейін жаңартылған театр күзде жаңа маусымын ашады. Жұмыс сапары аясында Дархан Сатыбалды Райымбек батыр мемориалдық кешеніне де барды. Негізгі құрылыс жұмыстары аяқталған. Қазіргі таңда ішкі әрлеу, аумақты көріктендіру және музей экспозициясын жасақтау жұмыстары жалғасып жатыр.