Алматы қаласында күшті әсер ететін дәрілік заттардың заңсыз айналымының жолын кесуге және оларды өткізу саласындағы құқық бұзушылықтарды анықтауға бағытталған "Дәрмек" жедел-профилактикалық іс-шарасы қорытындыланды, – деп хабарлайды kazlenta.kz тілшісі Polisia.kz сайтына сілтеме жасап.
Іс-шараның негізгі мақсаты – дәрілік препараттарды медициналық емес мақсатта пайдаланудың алдын алу, дәріхана ұйымдарына бақылауды күшейту, сондай-ақ дәрілерді босату кезінде заңнама талаптарының сақталуын қамтамасыз ету. Іс-шара барысында полиция қызметкерлері дәріхана пункттерін тексеріп, дәрігердің рецептісінсіз дәрілік заттарды сату деректерін анықтауда, сондай-ақ олардың заңсыз айналымына қатысы бар тұлғаларды белгілеуде.
Алматы қаласы полиция департаментінің есірткі қылмысына қарсы іс-қимыл басқармасының бастығы Батуржан Абдумасаров атап өткендей, күшті әсер ететін препараттарды еркін сату – жол берілмейтін жағдай. Бұл тек заң бұзушылық қана емес, сонымен қатар қоғамдық қауіпсіздікке тікелей қауіп төндіреді. Мұндай деректер ерекше бақылауда. Атап айтқанда, қала аудандарының бірқатарында дәрігердің рецептісінсіз күшті әсер ететін дәрілік заттарды сату фактілері анықталып, оларды заңсыз сатып алған тұлғалар белгіленді. Заңсыз айналымнан ірі көлемдегі дәрілік заттар тәркіленді. Анықталған барлық факті бойынша сотқа дейінгі тергеп-тексеру амалдары жүргізіліп жатыр.