Жетісу облысында полицей көліктен шыққан өртті дер кезінде сөндіруге көмектесті, — деп хабарлайды kazlenta.kz тілшісі Polisia.kz сайтына сілтеме жасап.
Өзгені құтқарған адамды батыр деуге бола ма? Әрине, иә. Алайда батырлар тек фильм кейіпкерлері емес. Көбіне олар – қарапайым жандар: дәл уақытында қасынан табылып, бейжай қарамай, көмек қолын созып, жауапкершілікті өз мойнына алатын адамдар. Осындай оқиға Панфилов ауданында орын алды. Патрульдік полиция ротасының қызметкері Таңжарық Малікұлы қызмет барысында күдік тудырған көлікті байқайды. Көліктен өткір иіс шыққан.
Бір сәтті де жоғалтпай, полиция қызметкері шұғыл әрекет ету туралы шешім қабылдайды. Ол дереу өрт сөндіргішті алып, көлікке қарай ұмтылады. Табандылығы мен кәсібилігінің арқасында өрттің таралуына жол бермей, дер кезінде сөндіреді. Жағдайдың салдары ауыр болуы мүмкін еді: көлік өртеніп қана қоймай, жарылыс қаупі туындап, айналадағы адамдарға зиян келтіруі ықтимал болатын. Алайда дәл сол сәтте қасында бейжай қалмаған жан болды. Қауіпті болдырмау үшін бар күшін салған нағыз азамат.
Бұл оқиға шынайы күштің сөзде емес, істе екенін тағы бір мәрте дәлелдейді. Осындай жандар үшін “Сенім, бірлік, абырой” – жай ғана ұран емес, өмірлік ұстаным. Олар погонды абыроймен тағып, халықтың шынайы құрметіне лайық.