Алматыда Наурыз мейрамы кең көлемде аталып өтті. Астана алаңында басты мерекелік концерт ұйымдастырылды. Қала тұрғындарын Алматы қаласының әкімі Дархан Сатыбалды құттықтап, Наурыздың жаңару, бірлік және ұрпақ сабақтастығының символы екенін атап өтті, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Бұл адамдар ежелден бір-біріне ізгілік пен бақ-береке тілейтін ерекше кезең. Мерекелік көңіл күйді қазақстандық артистердің өнері мен ұлттық нақыштағы театрландырылған қойылымдар айшықтай түсті. Алты тақырыптық киіз үй ерекше қызығушылық тудырды. Бірінші киіз үйде Ықылас атындағы музей қорынан ұлттық музыкалық аспаптар қойылды. Екінші киіз үйде инновациялық жобалар — роботтар, дрондар, оқушылардың әзірлемелері және жасанды интеллектке негізделген шешімдер таныстырылды.
«Digital 360 – Welcome to Almaty» киіз үйі панорамалық проекциялар арқылы қала тарихын тың қырынан көрсетті. Төртінші киіз үйде археологиялық реконструкциялар, соның ішінде «Алтын адам» ұсынылды. Бесінші киіз үй этнодизайнға арналса, алтыншы киіз үй XIX–XX ғасырлардағы қазақ тұрмысының дәстүрлі келбетін таныстырды.Мерекелік іс-шаралар 23 наурызға дейін жалғасады.