Алматы қаласында Азаматтық авиация академиясы базасында азаматтық авиация саласының кадрлық әлеуетін қалыптастыру және дамыту мәселелеріне арналған оқу-әдістемелік бірлестіктің кеңейтілген отырысы өтті, деп хабарлайды kazlenta.kz тілшісі ҚР Ғылым және жоғары білім министрлігіне сілтеме жасап.
Іс-шараға ҚР Ғылым және жоғары білім министрлігі, ҚР Көлік министрлігі, сондай-ақ жетекші әуе компаниялары, әуежайлар және салалық ұйымдардың өкілдері қатысты.
Жаһандық технологиялық трансформация, цифрландыру және жасанды интеллектіні енгізу жағдайында білікті мамандар даярлау мәселелері саланың тұрақты дамуын қамтамасыз ету, ұшу қауіпсіздігін сақтау және елдің бәсекеге қабілеттілігін арттыру үшін стратегиялық маңызға ие. Қатысушылар адами капиталды дамыту тұрақты экономикалық өсім мен авиация саласының ұзақ мерзімді дамуының негізгі факторы екенін атап өтті.
ҚР ҒЖБМ Жоғары және жоғары оқу орнынан кейінгі білім комитетінің төрайымы Гүлжан Жарасова білім беру бағдарламаларын трансформациялау және оларды саланың қазіргі және болашақтағы қажеттіліктерімен үйлестіру қажеттігіне назар аударды.
Азаматтық авиация академиясы басқарма төрағасының міндетін атқарушы – ректоры Қайрат Жакупов қазіргі кезеңде басты міндет – сын-қатерлерді талқылаудан жүйелі шешімдерді тәжірибеде іске асыруға көшу екенін атап өтті. Оның айтуынша, Жаңа мамандықтар мен құзыреттердің салалық атласы – білім беру бағдарламаларын жаңартудың, заманауи цифрлық және кәсіби құзыреттерді енгізудің, сондай-ақ мемлекет, білім беру жүйесі және индустрия арасындағы тұрақты өзара іс-қимылды қалыптастырудың негізгі құралы. Сонымен қатар Академия азаматтық авиацияға кадр даярлауды үйлестіруші негізгі алаң ретінде қызмет атқарады.
Отырыстың негізгі оқиғасы – азаматтық авиация саласындағы Жаңа мамандықтар мен құзыреттердің салалық атласын таныстыру болды. Атлас мемлекеттік органдар, жұмыс берушілер және сарапшылар қауымдастығымен бірлесіп әзірленген және саланың кадрлық қажеттіліктерін болжаудың жүйелі тәсілін көрсетеді.
Құжат жаңа және трансформацияланып жатқан мамандықтарды, болашақтың негізгі құзыреттерін, білім беру бағдарламаларын жаңарту бағыттарын, сондай-ақ білім беру жүйесі мен индустрия арасындағы өзара іс-қимыл тетіктерін айқындайды. Салалық кеңес қорытындысы бойынша Атлас азаматтық авиациядағы кадрлық әлеуетті дамытуға арналған стратегиялық бағдар ретінде бекітілді.
Іс-шара аясында Академияның авиациялық колледжі мен «Трансавиа» ЖШС арасында стратегиялық әріптестік туралы меморандумға қол қою рәсімі өтті. Құжат дуалды оқытуды дамытуға, тәжірибеге бағытталған дайындықты енгізуге, жұмыс берушілердің білім беру процесіне қатысуын кеңейтуге және түлектерді жұмысқа орналастыруға жәрдемдесуге бағытталған.
Бұл бастама техникалық және кәсіптік білім беру жүйесін жаңғыртуға бағытталған мемлекеттік саясат аясында жүзеге асырылады. Оның мақсаты – білім беру мен өндіріс арасындағы байланысты нығайту және мамандар даярлау сапасын арттыру.
Кеңес барысында білім беру бағдарламаларын саланың заманауи талаптарына бейімдеу, кадр тапшылығын еңсеру, үздіксіз білім беру мен микробіліктіліктерді енгізу, сондай-ақ білім беру жүйесін еңбек нарығының сұраныстарымен үйлестіру мәселелеріне ерекше назар аударылды.
Саланың әрі қарай дамуы кадр даярлаудың икемді, цифрлық және құзыретке негізделген моделіне көшуді талап ететіні атап өтілді.
Іс-шара қорытындысы бойынша қатысушылар «мемлекет – білім – бизнес» өзара іс-қимылының тұрақты экожүйесін қалыптастыру қажеттігін атап өтті. Бұл жаңа буын мамандарын озық даярлауды қамтамасыз етуге бағытталған. Өткізілген отырыс келісілген шешімдер қабылдауға және азаматтық авиация саласының кадрлық әлеуетін дамыту бойынша алдағы қадамдарды айқындауға тиімді алаң болды.