Балаларға шұғыл медициналық көмек көрсету орталығында балалар артроскопиясы енгізіліп, жүйелі түрде дамытылуда, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Қалада алғаш рет туа біткен ақау мен буын тұрақсыздығы кезінде тізе тобығын (надколенник) тұрақтандыруға бағытталған аз инвазивті оталар жасалды. Жаңа әдіс оңалту мерзімін бір жылдан 3–6 айға дейін қысқартуға мүмкіндік береді. Өткен жылы орталықта тірек-қимыл аппаратына 180 артроскопиялық және өзге де операциялар жүргізілді.
Ота жасалған балалардың барлығы толыққанды өмірге оралып, олардың көпшілігі спортпен шұғылдануды қайта жалғастырды. Медициналық араласулардың ауқымы кеңейіп келеді. Артроскопия — буынға шағын тілік арқылы шағын-камера мен арнайы құралдардың көмегімен жасалатын отаның заманауи, аз жарақаттайтын тәсілі. Бұл әдіс тіндердің зақымдануын азайтып, сауығу үдерісін жеделдетеді.